حتى نفهمهم

الجزء الأول

تخيلي ان زوجك ناداك للغرفه

(اللي مو متزوجات اقلبوها ابوك اخوك مرت جيرانكم،استاذتك، مديرتك.... اي احد ثاني)

ودخلتي وانتي شاقة الابتسامه

ولقيتي حاط قدامك كوب عصير 😆

ثم طلع من تحت الطاولة عصا غليظة

وقال لك..: "اذا شربتيه ضربتك بهالعصا

واذا ماشربتيه ضربتك بهالعصا"

.

.

انتبهي اجابتك ترا هي بتكون منهجيتك المعتادة بحل المشاكل

قبل ماتحطين تعليقات كلها تنظير وكلام انشائي

غمضي عيونك

خذي نفس

وتخيلي فعلا هذا الموقف صار لك

تخيليه بغرفتك

مع هذا الشخص

وحسي وهو يطلع العصا ويلوح فيها

ويقولها لك

.

ايش بتكون ردة فعلك الحقيقية

وتعالي اكتبيه لنا بالتعليقات

.

.

#حتى_نفهمهم_عشتار

.ــــــــــ

الجزء الثاني

سبحان الله ردودكم... مـ تـ و قـ ـعـ ـه ههههههه

.

قلت لكم.. انتبهو.. رح تكون هي منهجيتكم المعتادة بحل المشاكل

وحده قالت.. .

مثل هذي المشكلة

مشكلة على قولة وحده "خيرررر ان شاء الله"

يعني مافيها اي منطقية

.

طيب والحياة دايم تواجهنل بمشاكل منطقية؟

لااااااااااا طبعا

مرات تجيك مشاكل اقرب مالها بزوريه هههههه يعني مبزره.. مال امها داعي

.

المشكلة هذي مشكلة" موقف"

واغلب الردود حطو المشكلة في العصير

اللي قالت: امزمز عليه

واللي قالت: اكبه

واللي قالت: خير الامور الوسط اشرب نص العصير

.

عرفتو وين المشكلة في طريقة حلك للمشكله

واللي دايم اقولها؟

ان الاغلب يركز على المشكله "هنا كانت العصير"

وليس الحل " الخروج من الموقف اللي انتي فيه"

.

.

يعني السالفه مو سالفه عصيرررررر.. فهمتي 😆

.

.

على العموم اغلب اللي كانت ردودهم بهذا الشكل

التفكير عندهم منطقي

يعني بالمنطق

يعني 1+1=2

😆😆😆😆😆😆

ومرات حلول المشاكل تحتاج 1+1=5

.

.

.

.

طيب نجي للشق الثاني

واللي كانت اجابتهم على هذا النحو:

- اروح واترك له المكان

- اطلع

- اضربه بالعصا قبل مايضربني

.

مدامكم قريتو اللي فوق

اكيد رح تفسرون نوعية هالشخصيات

.

هذولا هم يغيرون الموقف

لصالحهم لضدهم مايهم.. بس انهم يستخدمون اي شي يغير الموقف اللي هم فيه

تركيزهم مو على العصير

على الموقف اللي انحطو فيه

.

.

.

طيب ايش احسن حل لهالمشكلة خاصه

والمشاكل بشكل عام؟ 

هو "الاتصال"

ايه تتصلين فيه.. شلون تتصلين.. بالجوال 😆

.

لا

بهذا - - - - > 👁 👁 

تاخذين العصا.. او تبعدينه.. وتتصلين معه بعيونك

هذا اسمه" تغيير العلاقه"

بدل مايكون هو في موقف قوة

تبدلينه لصالحك.. بان يكون موقفك "انتي القوه"

.

.

#يتبع

#حتى_نفهمهم_عشتار

.

ابشرح التالي.. وجداااا مهم 

بس يحتاج لتركيز قوي

.

مثل هذي المشكلة

قريت وحده بالردود كاتبه

ان زوجها قال لها اسبوع وتجيك ورقة طلاقك

لانها حذفت بنت زباله على قولتها يتابعها بالسناب

.

هي كذلك انحطت في معضلة الشاي

ان شربته ضربها

وان ماشربته ضربها

.

يعني هي يا بيرسل ورقة طلاقها

يا بيتابع بنات زبالات على قولتها

.

هاه وصلت الفكره 😆

يعني مثال العصير مو شي خيالي هههههههه

دائما ننحط في معضلات "احلاهم مر"

مانقدر نفوز فيه مهما سوينا

لاننا انحطينا بموقفين... مو واحد.. اثنين

.

لسى ماخلصت.. كملو بتركيز

.

.

لما ننحط بمثل هذي المواقف

دائما يلازمنا شعور سلبي

ثقي بهذا الشعور

اي نعم ثقي فيه

مثل صاحبة" التعليق" كتبت مشكلتها بالتعليقات 

والدايركت

والاسك

وممكن في حسابات أخرى 

لان فيه شعور سلبي قاعد يلازمها

ومالقت طريقه تشيله عنها الا بتحريك اصابعها بالكيبورد

.

.

ايش المفترض لما تتحطين بموقف ظالم مثل كذا؟

اذا شربتي العصير ضربتك

واذا ماشربتيه ضربتك

.

.

1- اشعررررري بالغضضضضضب

اطلقي الغضب اللي في داخلك

مو تطلقينه يعني تكسرين الدنيا 😅

لا يعني حسي فيه

.

يعني استشعري احساس الغضب

صح ان الغضب مو كويس

وتأثيره سيء

الا انه احساس مهم

ليه؟ 

لانه يعلمك بشي

يعلمك بشي انتي تعرفينه

يعلمك انك انتي طايحة بمأزق مزدوج بااااالغ الصعوبة 

ب مثال العصير هو "وقوع الضرب في كل الحالتين"

2- لاتحاولين تفهمينه 😆

اتركي المنطق وابو العقلانيه كلها

اذا جاك موقف مافيه اي منطق ومجرد" ورعنه وطفولية" فـ ستوب.. لاتفهمينه

لاتحاولين تفسرين ليه هذا التصرف 

ليه خيرك هالخيارين

وش سويتي عشان يضربك؟

.

خذي نفس

وقفي عقلك من التفكير

وتأملي الموقف

فقط

تأمليه

.

واسمحي لمشاعرك تنطلق

لاتخلين تفكيرك اللي ينطلق

لااااا

مشااااعرك

(ايش تحسين فيه؟)

.

بعدها

خذي ورقه 

واكتبي الخيارات المتاحه امامك باعتقادك

.

بعدها 

شوفي الخيارات 

لاتفكرين فيها

لأ.. بس شوفيها.. عطيها نظره

(ايش تشوفين؟)

.

.

عشان اسهلها لكم

تخيلي انك انسانه خفيه تطير بالسماء

ودخلتي على بيت هالحرمه

ولقيتي رجلها يلوح بالعصا ويهددها:

ان شربت ولا ماشربت بيضربها بالعصا

(ايش تشوفين؟)

.

كذلك لو انزنقتي بمثل هالموقف المزدوج

تخيلي انها مو انتي 

وقاعده تتفرجين على تمثيلية

او مسرحيه

(ايش تشوفين؟)

.

.

لما تتسلط على رقبتك عصا

- يا اطلقك او اتابع البنات الزباله

- يا اخذ عيالك او خذي لي قرض

- ياتحطين هالشغل باسمي يا افصلك <--- للمدير 😆

وخذي من الأمثلة كثير

بدل ماتخلينه يرمي الكوره بحجرك.. ارميها بحجره

ويكون الجواب:

(انا مارح اختار.. انت اختار.. هل تبيني بحياتك او لا؟)

وهنا رميتي المسؤوليه عليه

وهذا وجهي اذا اختار 😆😆😆

.

.

. 🔴 مهم مهم مهم:

💫 عشان تقوين موقفك

ابدي بعباره( أنا)

مو "انت" 

قولي:(أنا زعلانه).. مو "انت زعلتني"

(انا ماحد يجبرني).. مو" انت تجبرني"

وهكذا

.

💫خليك مباشره مع لباقه

مو تتغابين وتخلين نفسك مو فاهمه الموقف وتسبلين بعيونك

.

💫 لاحظي حالته: مزاجه، عيونه، حركات جسمه

.

💫 مهما كان مهما كان" اظهري الاحترام"

مو تهزين بكتوفك وتستخفين فيه او تقلبينها مزح ومسخره

.

💫 اسمعي له

لانه بالنهاية رح يعطيك المبررات .

.

طيب ياحلوات بالتعليقات اكتبو لي بعد ماقريتو بند( مهم مهم مهم ) ايش المفروض تسوي زوجة العقيد 😆 يوم قالها اذا شربتي بضربك.. واذا ماشربتي بضربك

.

.

وقبل ما انهي موضوعي

بالخطوات اللي ذكرتها

دوري اي موقف بحياتك تسلطت العصا على رقبتك

وتخيليه من جديد بالخطوات اللي ذكرتها

وشوفي النتيجة المبهره

.

مهم تسوينه ولا نسيتي مثال الشطرنج؟

#حتى_نفهمهم_عشتار

وللحديث بقية

..