سين و جيم مع زوجة

📍#سين_وجيم_مع_زوجه_عشتار

مشاكلنا واختلافتنا مع بعض بخصوص🔴📍

.

.

😬: ☄☄_البخل معاي انا وأطفالي والكرم مع الناس

.

👵:" هالنقطه ترجع لشيئين

اما انه يحس انكم ماتستاهلون.. والسبب يرجع بالذات لك لانك تهاوشينه وتنكدين عليه كثير

او يحس مدامكم ماكلين شاربين نايمين فانتم بنعمه 

ان كان كرمه مع الناس عزايم.. فهو يرجح النقطه الثانيه

ان كان كرمه انه يشتري للناس أشياء مايشتريها لكم فهي النقطه الأولى

الأولى علاجها تحسنين من تعاملك معه

الثانيه استخدمي اولادك نقطه ضغط.. انهم ينرحمون لانهم مختلفين عن اقرانهم... الخ"

.

.

😠:☄☄-اسرارانا وخصوصياتنا يطلعها اول بأول لأخته

.

👵:"لان اخته تسمع له.. وماعمرها حكمت عليه "تصدر احكام" او تتشمت فيه من عبارات "قلت لك" 

بينما انتي ممكن حتى نظراتك 👁 👁 فيها اتهام له"

.

.

😣:☄☄_يفضل أهله علينا انا وأطفالي وخصوصآ اذا عطوه وجه بزيادة يقلب علي انا وأطفالي (مادري ليش)

.

👵:"وانا اختك احلف لك ان ثلاث ارباع السعوديين كذا

والربع الثاني اللي ملتفت على حرمته يقولون عليه مسحور 😆

حاولي تكونين موازنه بينك وبين اهله

وتسبقينه بخطوه عشان مايلقى الا انتم

يعني مثلا كل جمعه يعشي اهله

اسبقيه وعشيهم الخميس

عشان مايلقى الا يعشيكم انتم

يعني استغلي ايش اللي يسويه والقطيه انتي بخطوه بدل عنه"

.

.

😤:☄☄_البصبصه والاهتمام في النساء.

.

👵:"ترا كل زوجة عندها مفهوم غير عن البصبصبه

اخرها وحده تقول منعت زوجها عن الافلام الامريكية لانه يبصبص على الحريم اللي يمثلون فيها

وممكن انهم يحسهم اناث وانتي لا

وعالم جديد عليه.. عكس العالم حقك

ممكن انتي اللي يقولون عليها اجوديه وبنت رجال

الناس يعجبون فيها ويمدحونها

ولكن الرجل يشوفها خويه اللي بالاستراحه"

.

.

😡:☄☄_يعاندني ويصر ع رأيه حتى لو غلط ولايشاورني.

.

👵:"طيب وانتي ماتعاندينه ولا تصرين على رايك؟ 

ولا وضعك غير معه

شكلكم كلكم روس ويبيلكم تكسير"

.

.

😟: ☄☄_غامض ولايتكلم عن راتبه او اي مبلغ يحصل عليه ويتحفظ ع خصوصياته

.

👵:"تنقين على راتبه؟ 

مايخاف الواحد على فلوسه الا اذا شاف احد حاط عينه عليهم"

.

😳:☄☄-فيه شيء يقهرني مرا مرا (((لما اتمشكل او اختلف مع احد حتى لو بوجهة نظر دايمآ يكون هو في صف الشخص الأخر ومؤيد له ومعاه حتى لو انا مظلومه حتى لو كنت على حق ))ويأييد الغير ويجامله على حسابي.

.

👵:"طيب جربي مره تقلبين الادوار

وشوفي رده؟ 

يعني خلي الشخص الاخر هو انتي

وانتي الشخص الاخر

وعطيه السالفه بالمقلوب

اذا وقف معك انتي وهو بالاصح تصرف الشخص الاخر.. فانه قاعد يقول لك الحقيقية من وجهة نظره

لكن ان وقف مع الشخص الآخر وبالحقيقة انتي.. اعترفي له انك قلبتي السالفه عشان تشوفين ردة فعله.. واسكتي بعدها 

مو تحاسبينه

رح توصله فكرتك.. ويحاسب في المرات الجاية"

.

. 😭: ☄☄_اذا أخذ أولادي معاه سواء ولدنا او بناتنا لإخوانه او خواته وغلط عليهم احد يسكت ولايدافع عنهم عكس اخوانه وخواته يدافعون عن اولادهم.

.

👵:"والله بديت اشك انك انتي حرمتن شرانيه هههههه 

رجلك صح.. ورجلك عاقل

وحكيم

ياما زعلات بيوت صارت بسبب اطفال

وهو مستوعب ان الاطفال دقايق وينسون لكن الكبار تبقى حازه بقلوبهم يمكن ليوم الدين

وبعدين تصرف رجلك صح

اذا انتي او هو دافعتو عن عيالكم بنيتو شخصية ضعيفه تستنى احد ياخذ حقها لها اذا كبرت

عكس اذا هم.. لانهم بيتعلمون بالخبرة والتجربه ويكون نموهم الاجتماعي اذكى من غيرهم"

.

.

😠: ☄☄_يثور يصايح ويصارخ ويقلب البيت فوق تحت ويعصب اذا طلبت منه فلوس او سألته عن راتبه مع انه يعطي الناس بنفس طيبه لا وبعد يتسلف ويحمل نفسه ديون ويعطيهم.

.

👵:"قلتي يتسلف ويحمل نفسسسسسسه

مين اللي رح ينظر في النهاية.. هو

من اللي بيدخا السجن لاقدر الله لو احد طالبه.. هو

ف ممكن ثورته لانك قاعده تشتغلين وصيه عليه

شوي وتقولين له يبيلك من يحجر عليك

طريقة طلب الفلوس كتبت عنه بوست"

.

.

😒: ☄_لمايسافر مايتصل ابدآ ولايطمن علي او على اطفاله ولايعطيني مصروف لي ولأطفاله اثناء سفره وأخذ منه المصروف بالقوه والزعل.

.

👵:"اذا سافر.. ارسلي له صور وفديوات اولادك ولعبهم ووناستهم وضحككم وقعدتكم.. كانه معكم 

اغتقد ان سبب اغلب مشاكلكم الماده "

.

😕:☄☄ دايمآ انا وزوجي اذا جلسنا مع بعض وتكلمنا في أشخاص معينين زوجي يبدء حش وسب وإذا تكلمت وحشيت معاه 🤗

هنا يرفض احش واسب ويقعد يذكرني بالله وحكم الغيبه والحش ويرجع هو يكمل حش وسب 

صراحه محيرني مره شي غريب.

.

👵:"ممكن اسلوبكم بالحش يختلف؟ 

شوفي عباراتك وعباراته ولاحظي بعدها"

.

.

☄☄-من ضمن مشاكلي مع زوجي

سوء فهمه

لما اشكي له من اي احد يحط باله أني اشيشه ع الشخص اللي اشكي منه ويعتبرني ظالمه ويقعد يدافع عن الشخص وإني بشيشه ومدري ايش

.

👵:"لاتحكين باهله 😆..هم الداخلين وانتي الطالعه"

.

.

😢: والله العظيم يظلمني كذا مره وضحت له إنّو مجرد شكوى وفضفضه لأاكثر ولأاقل

.

👵:"لاتشكين.. جميع الرجال يكرهون الشكوى

وواحد من اكبر اسباب الزواج من أخرى هو كثرة الشكوى" .

.

😡:☄ ☄-عدم تأمينه مستقبل اطفالنا من بيت ملك وغيره وعدم اهتمامه

.

👵:"طيب انتي حطيتي له خطه بطريقه التأمين 

لان مية بالمية عنده خطه ماتدرين عنها

ابسطها الورث"

.

.

😤:☄-يكره اطلع برى البيت سواء السوق او زياره لأي احد او حتى لأهلي.

.

👵:"عطيه خبر بالطلعه قبلها بكم يوم بالتاريخ واليوم والساعه"

.

.

😣:☄☄ ولاحياة لمن تنادي((مصيبتنا عظيمه في ابونا يبي الناس يهينونا ويغلطون علينا واحنا ساكتين بس بعيد عنه بعد السماء عن الارض)

.

👵:"ليش حاسه ان قصدك بالناس في هذي العباره هو "أهله؟" اذا ايه ياختي حلها سهل

ابسطها اقري بوست اطعم الفم تستحي العين"

.

.

😡☄☄-بناتي قبل لما يروحون لبنات عمهم وأي وحده تغلط عليهم يأخذون حقهم ولايسكتون وهم صغار وإذا درى ابوهم يجيبهم قدام البنات ويبحلق بعيونه فيهم ويصيح عليهم ويقول خلوكم مؤدبات واحترمو بنات عمكم ولاتقلون ادبكم علمته هههههه لا وبنات عمهم صغار بنفس سنهم ويبي بناتي يعظمونهم ونصحته اللي يسويه اكبر غلط ويحطم بناته ويذلهم بس مانفع معاه اخر شي منعتهم بروحه لعمانهم تأديب له ولهم لحد الأن لي سنوات ويحاول فيني لحد الان وانا رافضه لأنه ابله ومعتوه وقاعد يهين ويذل عياله وهو الي المفروض يصير مصدر أمان وقوه

.

👵:"طيب بهالسنوات هم كبرو

وهو فهم

المفروض تجربين

ياختي شكلك قويه وماتبين تتنازلين ابد"

.

.

😠😠😠: (ابله معتوه ومتولي عائله ،،،اكبر مصيبه بالدنيا)

.

👵:"شفتي لو اني قاريه هالعباره اعرف ان صاحبته تنشد حل 

لان دايم اقول اللي تكره زوجها لااااااتدور حلول لانه ابد ابد مو مستعده انها تغير من نفسها عشانه

لانها تشوفه مايستاهل"

.

.

😞:📍📍-بخخخخخييييييييييييييييييييييييل معاي انا وأطفالي وكررريييييييم مهايطي مع الناس

.

👵:"الحين رجحت النقطه الأولى.. يشوفك انتي وعيالك ماتستاهلون"

أطعم الفم تستحي العين

#عشي_حمولتك_عشتار

فيه حكمه سمعتها.. وتجيب نتيجة لكل من تعاني مع حمولتها

او دوامها 

او مع ناسها "الكرم يغطي العيوب"

عندنا مثل يقابله 

ا( اطعم الفم تستحي العين )ا

خلي يوم.. وارسلي لام زوجك المتسلطه اللي مطينه ام عيشتك على قولتك.. عشيات واكلات.. عندها ناس ادخلي بطبق يبيض وجهها..

ولدها المسافر توه يجي ارسلي المطازيز اللي يحبه... واتعبي عليهم.. تكونين انتي طابختها مو من السوق، اذا من السوق بيقولون خسرت ولدنا..

انتي طابخته عشان تحس انك دخلتي المطبخ عشانها وتعبتي عشانها 

فيه حريم ذهينات.. تروح تطلب من اللي يطبخون في البيوت وتقول انا.. بس انتبهي لاينكبك ولدك 🙎

#

بالكرم.. يمكن يكون شافوا عليك شي غطيها بالجود

#

#

سرّاقة الرجال

بسم الله، ماشاءالله

.

هه حطيت الموضوع... اشوفكم عاد بالتعليقات.. ياااويلكم 😠😠😠

اقرو الموضوع كامل.. اولا

ثانيا.. انا جبت المواصفات من كتاب فأنا غير مسؤوله عن الموضوع وسوء استخدامه.. فأنا مجرد ناقله لما في الكتاب

ثالثا.. للموسوسات.. هذي الصفات لازم تجتمع كلها مع بعض.. مو تاخذين صفه وتقولين قالت #عشتااااار

بعضهم تكون فيهم كلها.. لكن يردعها بالنهاية الدين او العرف او الخوف.. وهذا مقاييس مهمه في سلوك اي انسان

.

نغوص في موضوعنا..

.

.

🔴 كيف يكون شكلها؟

جذابه وحلوه

ووسيعة صدر

وسواليفها حلوه

وتجيب السعادة في كل مكان تدخله

.

🔴 كيف ملابسها..؟

تكون اجدد وافضل الملابس.. ابد ابد مو مهرقله

مظهرها على سنقة عشره

.

🔴 كيف تعاملها؟

تتعامل معك كانها تعرفك من زمااااان

.

وتحسينها انها تحبك

يعني تحسسك بهذا الحب

.

درامية في التعاطف

اذا جيتيها بمشكله.. بتلقين تصيح وتبكي بطريقه دراميه حتى انتي ياصاحبه المشكله ماسويتيها

لانها ماتعرف تتعاطف.. ماعندها قلب تتعاطف فيه.. فما عندها الا طريقة التمثيل.. وتبالغ لك بالتمثيل كأنها بمسلسل كويتي 😆

تحية لشعبنا الكويتي وخمسسسه مواااح ندري ان درامتكم ماتمثلكم ❤️

.

.

🔴 كيف وضعها؟

تحب تكون مركز الاهتمام والكون

ف تشوفين مرة تحب فلانه ومره تكرهها

وحبوها معي

واكرهوها معي

.

🔴 كيف صرفها؟

بخيله 😆

يعني ماتدفع انتي اللي بس تباشرين عليها باكل وشرب

.

.

🔴 كيف شخصيتها؟

🍁 - مرات تحسينها على نياتها

وكل من يقدر يلعب عليها

ف ينقطع قلبك عليها بالنصايح والتوجيه... وهي ماتحتاج 😑

والله ماتحتاج

لان بس تبي اهتمام بالصحيح

تضلين تهتمين فيها .

🍁 - حسود مدري حقود

اي احد عنده شهره ولا مال ولا حتى زوج.. تحس ماتستاهله

والمفروض انها هي بهالمكان مو هم

مثلا بنت عمها 😆 قبت الدنيا ف صارت مشهوره بالسناب.. تشوفينها بتسبها ولاتجعلو من الحمقى مشاهير وانها ماتستاهل وايش هالسناب وتسب السناب

وانه مرض وتجسس ووو

فجاءه تلقينها تصور سنابات بكل هاي كلاس، كنها "اعلاميه قديره محترمه"

يتهدل فكك لصدرك.. وووووووين ذيك اللي تسب السناب ومشاهير السناب

.

🍁 - تلقينها تعظم نفسها،" انا وانا.. انا وانا"

مو انانيه

مو نرجسيه

تخلي نفسها مافي هالبلد الا هالولد.. طبعا الولد هي 😆

السبب لانها تشعر بعدم الامان والضعف

وتحاول تعوضه بالمبالغة في تعظيم نفسها امام الآخرين .

🍁 - عينها على اللي بيد غيرها

ماعمرها اقتنعت باللي معها

كيف تعرفينها وخاصه انه مارح تبين ان عينها على اللي عندك

بسيطه.. مجرد انك ماتحسين انها عينها على فلانه وانها ماتستاهل لا ذا البيت ولا هذا الزوج

ولا السفريات ولا الروحات او او

بتلقين نفس الشي انتي وضعك عندها

.

🍁 - عندها شراهه بالاكل والصرف.. الصرف على نفسها

تشوفينها تبلع وتبلع.. بس جسمها حلو او مقبول لان ممكن تستفرغ بعده.

او تسوي رجيم

او تحط حيلها بالرياضه .

🍁 - بالعادة تنشأ تحت ظل اسره مفككه او مشتته

همها المظاهر اكثر من الجوهر

.

🍁 - متكبره.. ماتبي مساعده احد

ماتذل نفسها لاحد عشان يساعدها حتى لو محتاجه

.

🍁 - لاتستغربين اذا شفتيها تحضر دورات او محاضرات عن المشاكل الاسريه 😆

ميه % يتابعوني هههههههه

.

🍁 - الشي الطبيعي.. انك اذا ماحبيتي احد ولا اعجبك هالاحد

تعطينه اشكل وطناش

لكن هي العكس.. 😁 تحرص انها تترك انطباع قوي في مخ مخه

وتستغربين.. تقولين لها "همااااك ماتوطنينه بعيشة الله وشووووله مشقيه عمرك فيه؟؟؟🤔"

.

كيف حياتها الزوجيه؟

🍁 - الزوج.. كل هدفها بالحياة انها تدور زوج مثالي يعطيها المكانه اللي تبيه

ف يكون رجال مفصل تفصيل

ولو تزوجت ترهقه ماديا ومعنويا

لان غيرها مو احسن منها

وتلقينها كريمه وتوزع فلوس وتعزم وتستعزم على حسابه بدون رادع..

ويهمها مكانته عشان تباهي فيه

.

🍁 - واذا حست انه خلاص ماهنا فلوس عنده.. تبدا تشتغل عليه هواش وصراخ ليل ونهار.. وتحطمه وممكن توصل معها انها تطلب الطلاق

.

🍁 - وتبدا تدور الحين على زوج غيره.. وممكن من أزواج صاحباتها 😆 وخاصه ابو فلوس

ايه.. ابو فلوووس وقصور

.

🔴 هل في أمل انها تتغير؟

فيه.. بس شلون تتغير!

اذا جتها ضربة على رأسها ضربه قووووويه

كأن بغت تموت بحادث

او فقدان شخص عزيز عليها

شي يأثر على حياتها تأثير قووووي

هنا تتغير

لانها طاحت وانهارت

.

ف تصير بسببها حساااااسه.. تدور على التعاطف من اي احد

تتحسس من اي كلمة وتحس انها هي المقصوده

لان قبل كانت تغطي عيوبها باهتمامها بنفسها وشكلها ولبسها

وبتعظيم نفسها .

الجزء هذا للرجال اللي يتابعوني من وراء الجدار 🙃

.

ان كانت عندك زوجه مثل هذي.. وبالنهاية قررت ترجع لك او انت تبي ترجعها لأي سبب كان.. عشان الاولاد مثلا

هي اكيد رح تتطلق من الشخص الثاني.. وقلت اكيد لانه انصدم بالواقع المخالف لحقيقتها

لان أثناء علاقتها معه.. كانت تعظم من نفسها

وتحط انها الجباره في المواقف الطياره

لين يعجب بكلامها وبعجتها لنفسها

ويطير بشكلها خاصه اذا شافها بالشوفه الشرعيه مثلا

بعدها يعرف ان الله حق.. وانه ضيع ام العيال عشان سراب

هي سراب عنده

بس مو سراب عندك.. لانك انت تعرفها قبل

وهو مايعرف الا الصوره اللي قالته له عن نفسها.. وماقالت طبعا الا بطولات

.

لما ترجع.. بعد صدمه وتكون حساسه ومنهاره

معاملتك خلها تختلف عن اول

مو تذكرها بأيام اول وكيف كانت قويه وكيف عزيزة نفس وكيف وكيف... غلط

خلها تستفيد من الدرس

لانها تظن ان الناس ماتقدرها الا لمظهرها.. عشان كذا تبي ابو فلوس.. لانه هو اللي بيعطيها مكانة بالمجتمع

خلها تعرف الناس تقدرها لذاتها مو لمظاهر خداعه

لانها بالعاده تكون نشأت تحت اسره مشتته او مفككه

بسبب هالشي تشعر بعدم الامان وعدم الكفاءة.. ف تبحث عن المظاهر

اشبع عندها هالحاجتين

اشعرها بالامان

اذا قالت: متى تجيب البيت؟

لاتقول العين بصيره واليد قصيره

قول لها: ان شاء الله ما اجيب لك بيت اجيب لك قصر.. وانتي ملكه في هالقصر والخدم والحشم حولك

(اشبع جانب الأمان عندها) .

قالت لك على شغله: ماعرف.. مو تاخذ الشغله من يدها وتقول ايه ماعلموك اهلك!!

قول لها: ماحد ولد من بطن امه يعرف.. انا وانتي مع بعض نتعلم.. انتي تعلميني وانا اعلمك... اشعرها انها رح تكون كفو وتقدر

(اشبع جانب عدم الكفاءة عندها)

.

هنا تكسبها في المقام الاول.. ولا رح تنحاش منك من البدايه

لان هالشيئين هي سبب مشاكلها.. وتفرعت منه مشاكل اخرى

اخرجتها بهذي الشخصية

.

بالنهايه هي مو شيطان

بس تعاني بخلل في شخصيتها .

#انتهى

.

١٥ نصيحة لجذب الرجل

بسم الله، ماشاءالله

.
15 نصيحة اثبتتها دراسات في علم النفس
لجذب الرجل
اتمنى انكم تجربون حبتين بس منها في ازواجكم عشان تعرفون قوتها
.
ملاحظة: اي تعليقات من باب
مسخرين حياتكم للرجل
تقدسون الرجل
متعبين حالكم عليهم وعيشو حياتكم.. ومن هالنصايح حقت ابو ريالين
والله ثم والله ان هذي المواضيع ارحلها كلها للحساب الخاص ابو فلوس 😈
هرمنا واحنا نقول: الحياة الزوجية الناجحه هي اساس للصحه النفسيه
من الزوجه
للزوج
لبناء اولاد صالحين
والنتيجة مجتمع بناء
.
وندخل لموضوعنا
ايش يقولك؟
.
1- لغه الجسد مهمه
لانه اول شي يشوفه
شفتي الحركه اللي بالصوره
مو شعرها ومكياجها 😑
قصدي طريقه تميل الجسم
ينفتن فيها الرجل
غير ان فيها انوثه
وتظهر ايضا انك مهتمه فيه

2- التواصل البصري
عين بعين
سمعتي ذي المعلومه الف طعش مره
بس مين يطبقها؟
الغالب تواصلهم البصري تناظر فم زوجها
حواجبه
جبهته
ان شاء الله شنبه هههههههه
وماتحط عينها بعينه
.
من عجائب الاسك عندي
ان كثير يشكون انهم حبو دكتور
وخاصه دكتور عيون 👀
بسبب ان عيونها بعيونه
هي يجي خازوق بقلبها
اما هو مايناظر عيون بنت.. يناظر حاله مرضيه يبي يكتشفها عشان يعالجها
والبنت وصلت وقتها انها سمت عيالهم ريناد وعناد هههههههه
.
Look at pic
انظري للصوره وخلي الخفوق يتخصبق
.
واذا تبين الضربه الذباحه؟
اقرنيها ب ابتسامه 👄
.
طبعا جامعه مايسوري سوت تجربه نفسيه
واستفيدي منها يالمقبلات على الزواج
وتشكون ان الخطيب يشوف الشوفه الشرعيه وينحاش
.
التجربه انهم جلسو حرمه في مطعم 🍴
وخلوها تتواصل بصري مع الرجال
لقو ان 20% من الرجال راحو لها
لكن يوم قرنتها ب ابتسامه ارتفعت النسبه ل 60%
.
من هذي التجربه وانا امك استفيدي كالتالي
اذا دخلتي للشوفه الشرعيه
خلي بينكم تواصل بصري
واختميها بابتسامه خجوله
ونزلي عيونك في الارض
هذا خشمي 👃 ان ماقال لابوك متى العرس ياعم 😆😆😆
هالحركه نتيجة فتاكه 👯 ولا تضيعين وقتك بمكياج ورموش واستشوار .
ايه ايه يالمتزوجات ان لقيتي وحده تتواصل مع زوجك تواصل بصري مو نظره عابره.. بخقي عيونها
امزززززح
.

3-الاضاءه
عاد هذي معروفه وتشوفونها كثير بالافلام الرومانسيه
يحطون اضاءه خافته
السبب انه تظهر جمال وغموض للمرأه حتى لو كبت عشاها هههههه
.
لو صورتي صور.. حاولي تكون باضاءه خافته
عاد ياكثر الفلاتر العبي فيها لعبتك .
ولما سوو دراسه ان الرجال يختارون صور لنساء
اختارو اكثر شي الصور اللي فيها اضاءه خافته او معتمه.. مثل اللي بالصوره
.
اذا كنت بتطلعين انتي وزوجك لكوفي او مطعم
وتبين تناقشينه في امور مايقول عليها لا
احرصي تختارين مكان فيه اضاءه خافته
بس اخاف انتي اللي تخقين وهو اللي يلعب عليك ههههههههه
كان ارشح لكم اماكن رهيبه.. بس مابي اسوي لهم دعايه 😆👊
.

4-رقم اربعه
اعذروني ذا ابخليه في الحساب الخاص 😅
.
ف خلونا ننط لرقم خمسه

5- المشي على يساره
اي نعععععععم.. لاتمشين الا على يساره واحرصي على هذا الشي
لاحظي مرات.. لو رحتو مثلا في فندق 🏩
انه يختار في السرير الجانب اللي انتي تكونين على يساره بالعاده
وان كان لا.. احرصي انك تختارينه انتي
.
طيب ليه #ياعشتار
لان الجانب الايمن من الدماغ يرتبط بالعواطف والجمال
ويكون اسلاك المخ الايمن مشبوكه على الجزء الايسر من الجسم 😅
بينما في المخ الايسر يرتبط بالتفكير والمنطق
واسلاكه مشبوكه على الجزء الايمن من الجسم
.
ف لو حطك على يمينه تراه يشوفك "اوشو الحكيم" 😆
ولو حطك على يساره انتي "مارلين مونروته"
ف انتي لاتستنين ولفي وامشي معه على يساره. واقعدي على يساره
ونامي على يساره
خليه يتنفس جمال وعشق
.
واذا جيتي تسولفين سولفي واهمسي على أذنه اليسرى
هذا بيخليه اكثر عاطفيا معك
.
لكن لو جيتي تكلمينه بموضوع جدي وانتم تمشون
صفي يمينه 🙆
.
الدراسه من جامعه سام هيستن
.

6- استغلي العطور
ادري انا ام مواضيع الفرمونات
لكن الفرمونات ذكرتها وقت النوم
اهميتها مثل الطفل اللي يتعود على ريحه امه في الليل
ولا ينام الا على ريحتها
فقط نبهت وقت النوم المعتاد مو الليالي الملاح.. مو عاد ابد ناشفه مايشم منك ولا ريحه حلوه .
لو مثلا سافر.. حطي لك قطعه بشنطته فيها بخه من عطرك
تذكرون حركات بنات اللذين اللي يعطرون بحوثهم قبل مايرسلونها للدكتور 😆
ذولا فيهم فطرة كيد النساء من ربي اللي مايخافن الله
وينهن ابي اعرف شلون عايشات الحين مع رجالهن.. حررراااام حررررااام.. حركة منديل باخه فيه عطر ومدخلته بالبحث جعل بحثك للدود ✊✊
فصلت عليهن باين اني مقهوره منهن هههههههههه
.

7- الاندروفين
ذا الاندروفين تسلب.. لانه هو اللي يجلب السعاده
والمصيبه ان الجسم ماينتجه الا بالطقس الحار
بس احنا طقسنا شوي.. باربكيو.. مو حار
بس ولو نبي هالاندروفين
على وقت العصريه
والشمس حاسره
جهزي جلسه "شويهي" ☕ في الحوش
ماتشوفون الكبار سعيدين بتسدحهم في الشموس 😆 الاندروفين لاعب لعبه معاهم
.
جلستك هذي معه.. رح يخلي مزاجه حلو ورايق
عاد بقول لكم ذي
بس اخاف تقولون عاد بالغتي مرررره يا عشتاااار
بس ماعلي بقولها 😑
افتحي جوالك 📱 على الطقس.. واختاري يوم جوه لطيف 🌡 وحلو وجهزي الجهوز
.

8- احمريكا
عاد الاوليين سبقووونا بعلوم الاحمر
مرارا وتكرارا اثبت ان اغلب الرجال يحبون النساء باللون الاحمر
جربي فستان احمر.. وروج احمر.. وافتني الرجال 😈
.
كان اقول لكم على روج احمر رهييييب.. يناسب البيضا والسمرا.. بس مابي اسوي دعايه 😆
.

9- الضحكه
وقد قلتها.. اضحكي على نكته السامجه
اصلا ليش عطاك نكت سامجه.. الا لانه تهمينه ويهمه يشوف ضحكتك
ويبي يسعدك ولو بالكلام
ف ادددهكي ادددهكي يخرب بيت ابليس
.
اذا تبين السواليف في اي وضع بالعالم تستمر مع الشخص الاخر
بين فتره وفتره وسالفه اضحكي
بس عاد مو تزودينها بالضحك ويقول: خيررررر وش ذي الصحيحه
او يشك بعمره
.

10- الصوت مو شي تقدرين تتحكمين فيه لكن تقدرين تغيرينه شوي
عاد ذي شلون اشرحها
ولا ابي اقول لكم على اصوات مشهوره لا يكبر راسهم
بس الرجال ماينجذبون بالعاده للاصوات الحلوه والجميله.. لان already عندهم فكره ان اصحابها شييووون ههههههه
ينجذبون للاصوات اللي نبرتها عاليه
يشفونها اصوات اكثر انوثه وموسيقيه
فمثلا اذا سولفتي مع زوجك لاتخلينه بنبره رتم واحد.. حاولي تعلين بعض الجمل فيه

11- التبختر بالمشي 🙈🙈
عاد مافي اشطر من مسلسلات الابيض والاسود المصريه مثال في تبختر المراه بالمشي
اصلا التبختر هذا اقوى مغناطيس جذب للرجال
كان جيل النساء الاول شاطرات في التبختر
بس جيل ذا الوقت وبسبب الدراما الكوريه صارت مشيتهم مشية عيال
.
خلي مشيتك وبـ تبختر فيها غرور
بيطير زوجك بساقتك بعدها
.

12- الطول
ان شفتي زوجك يقول انا كنت أتمنى وحده طويله
اعرفي ناقصه خمخمه.. احضنيه.. لان في دراسه تقول ان الرجال اللي يفضلون الطوال كان بسبب انها تقدر تحضنهم
مثل الام اللي تحضن ولدها وتلمه
ف لما يقول لك ياسنفوره ياليتك طويله شوي..
انقزي فوق الكنبه وخميه 🙆
.
.

13- الجلد اللامع
صح نصحت قبلها انك تكثرين شرب ماء عشان يطلع وجهك متوهج
لكن حبهم له.. لان يحسون انها امرأه حيويه وصحيه وممكن تجيب اولاد اصحاء وتقوم فيه
ايييييه كل هذا من جلد
.
نصيحه تلطسي قبل ماتنامين بفازلين.. واغسليه من بكرا.. مو تخلين وجهك يلمع مثل المرايا
حتى اللمعه لها فنها
مو كل الاماكن تحطين فيها لايتر.. بس ضربات خفيفه على بعض الاماكن.. مثل الوجنتين من فوق .
.

14- الخدعه التاليه
اذا سمعتي المفاتيح بيدخل عليك.. امسكي موسوعه 😆 وخلي نفسك تقرين هههههههه
لا عاد.. ترا حلو تقرين
القراءه مفيده
مررررره مفيده
وخاصه وقت خروجه من الدوام ههههههههه
مو خدعه.. اصلا تكونين ماخلصتي شغل البيت الا في هذا الوقت 😅
.
الرجل.. مهما كان.. بالنهايه يجذبه ماتحت السطح "العقل"

فاذا كنتي تعتمدين على شكلك في جذبه
بتخلص السواليف لان ماعندك شي تحكين فيه
عشان كذا القرايه وخاصه وقت خروجه من الدوام هههههههه مهمه.. لانها بتعطيك فكره كذا سالفه وحدوته تسولفونها على بعض

15- اللمسات
تكلمت كثيرررر عنه وعن تأثيره
عطيه كذا لمسه
ف اذا بادلك اللمس.. او لمسك قبلها
فـ مبرووووووك.. فهو يحمل لك عاطفه كبيره
لاتستنين لمساته
مثل ما الأم ماتستنى عشان ترضع اولادها وتهتم فيهم وهم لحمه حمراء.. تحن عليهم قبل مايعرفونها
فانتي نفس الشي.. عطيه لمسات.. لاتستنين هو يعطيك بالبدايه
.

كيف تأثرين عليه

بسم الله، ماشاءالله

#

وحده من خطوات التأثير على الشخصيه اللي قدامك

او تبين تسحبين منه اعتراف بشغله وخاصه ان كان راسه يابس

لاتجينه بشخصيتك.. لانه رح يتعامل مع هذي الشخصيه بكل صد وقوة

لاحظيه وراقبيه.. مين اكثر شخصيه تأثر عليه وياخذ بكلامها

مين اكثر شخص يحبه ولا يتمنى زعله

نقول فرضا انتي "اخت" هذا الشخص

و"زوجته" هي اكثر شخص يتأثر فيها ويقتنع بكلامها

او يعلمها كل الصحيح بدون لف ودوران ومراوغه او كذب

هنا ايش خطوتك انتي ياذا الاخت؟ 

استخدمي نفس تعابير وجهها

نمط ونغمه صوتها بطريقه الكلام

مظهرها

رح يرخي دفاعته على طوووول لانه بيتذكر زوجته اللي مايغبي عنها شي 

وتقدرين كذلك تاثرين عليه التأثير المطلوب

.

اقربها لكم اكثر

مرات تشوفين شخص غريب في انتظار المستشفى 

وترخين كل دفاعاتك

وتعطينها الاكو والماكو

ولما يقولون لك: خبله كيف تعلمينها بكل شي مابقى الا تقولين وش لون الاندوير اللي لابسته 😆

بتردين: مادري ذكرتني بفلانه

"وهذي الفلانه" هي شخص تحبينه مررررره مره

على ان هالغريبه اللي بالمستشفى ماتشبه فلانه صديقتك لا بالشكل ولا بالجسم

لكن في شي شدك للحنين معها وارخى دفاعتك

ولو تمعنتي اكثر

بتلقين انها تحمل نفس تعابير وجه "فلانه" ونفس نمط الصوت

.

وهالشي مو دايم ايجابي لان ممكن مرات يخدعك

ويعطيك تصنيفات خطأ للناس.. لان خبرتك مع "هالفلانه" خلتك تعرفين ان قلبها ابيض

فخلاص عممتي التجربة، وتتعاملتي مع الكل اللي يحملون هذا "النمط" ان قلبهم ابيض

واخر شي تاكلينها وتنصدمين انهم مو ناس كويسه

وبالتالي اكيد صدمتك تنعكس على هالفلانه وتخليك تتعاملين معها بجفاء

.

اتمنى ان واضح الشرح

ان مافهمتيه اقريه مره مرتين وبتفكين عقدته

.

#واحدة_من_طرق_التأثير_عشتار

.

١٠ أشياء يريدها الرجل من زوجته

هلا هلا.. موضوع جديد

#عشرة_على_عشرة_عشتار

.

هذي 10 شغلات كل رجال العالم يبيها من زوجته

اذا طبقتيها..ذيك الساعه تقدرين تبطين عينه وتقولين له انا وش قصرت معك! 

لانها تشبع حاجاته النفسيه قبل الجسدية

.

هذي الحاجات اللي تعتبر السبب الاول والاخير اللي يخليه يبحث ويفتش عن امراه.. ماقلت عن زوجة.. عن امراه

لانه وحده من اسباب خيانة الازواج.( الخيانة 😡 الموضوع اللي بطلت اتكلم فيه):

اول شغله

.

1- الاحترام

اكثر شغله يبيها الرجل في الدنيا من زوجته

وانا لاحظت شب غريب من بعض الزوجات.. انها تقلل احترامه بالسوق ولا قدام اولاده.. ولا قدام اي احد ثاني

على انه يقدر ساعتها يلتها على عينها كففف

بس يمسك نفسه

ولا صارت اللحالها معه ترقص له وتضحك له

وش زينها وش حلاتها

بس الشي المؤسف انه مارح ينسى.. ورح يخليها بقلبه

لين يجي موقف ويعاملك فيه بقلة احترام بدون مايحس

.

حاولي ثم حاولي تحطين لسانك في لهاتك اذا مو قادره تحترمينه

.

.

2- الإعجاب 

استغرب من اللي تقول من بديت اظهر اعجابي له كبر راسه علي

ياختي خليه يكبر راسه..وش وراك؟ 

لين يجي ظربه على راسه من العالم الخارجي ويوقفه عند حده

.

طبيعه البشر رجل ولا امرأه ينشدون الاعجاب.. مثل غذاء الروح.. تعطيه دافعيه للحياه 

ويصير يتعلق فيك لانه مايقدر يستغني عن هالجرعات اللي تعطينه اياه

ولا لقى احد ثاني غيرك يعطيه اياه

ف اعجبي فيه وانا اختك..اعجبي فيه وش وراك

.

3- الرفقه

لو حتى بيروح البقاله يجيب خبز.. قولي بروح معك

لو راح المطبخ يصلح اللمبات.. الحقيه وشيلي اللمبات

لو راح الحوش يولع فحم.. ولعي معاه هههههه

لو قام الصبح وانسدح على الكنب.. انسدحي جنبه

لا لا ذي مو لزقه... ذي اسمها "سول ميت" حتى تكوني سولو ميتووه

.

4-نبره صوتك...تكون مبسوووووطه

لانه بيحس انك فرحانه لانك سمعتي صوته

وحده تقول كلما دخل زوجي راجع من العمل اقوله: "هلا والله" 

كاني شايفه مين من الوناسه

تقول مرات اذا زعلت ما اقولها له.. تقول والله ينقلب يومه بس متنكد لانه متعود عليها

وتقول تعود على هذي النبره مني.. ف صار اذا شافني ولا شاف اي شي يبسطه قال: "هلا والله"

جربوها

.

ايه تذكرررررت.. انتشرت كثير ب" هلا بووووي"

ليه؟ مو عشان اللفظه

عشان النبره

نبره جدااا مبسوووطه..وصارت دارجه بشكل كبير بين الرجال

.

.5- التشجيع

نفس نقطه الاعجاب..شجعيه..وش وراك

الرجل ليه يحب يخط راسه بحجر امه

لانها تمسح على راسه وتعجب فيه وتشجعه

ف يحس هي مثل البنزين له بالحياه 

مايقدر ينقطع عنها

.

انتي نفس الشي شجعيه..حتى لو صد عنك شوي يرجع لك ولهان لانه فقد الشريان اللي يغذيه

6- التقدير

اعرف ان البعض مو قادر يفرق بين الاحترام والتقدير

التقدير مثل ماكنت اقول لو جاب لك كيسه خبز.. قولي له شكرا والله يعطيك العافيه

خليه يحس انك مقدرته

مو جاب ولا ماجاب كله بالهوى سوى

.

.

7- اعترفي فيه

واعترفي بدوره في حياتك 

صدق او لاتصدق.. اغلب الزوجات تعتبر زوجها تحصيل حاصل

ماتحمل له ذاك الاحساس بانه زوجها وله دور في حياتها

بس تشوفه رجال البيت

الرجل اللي لازم يكون في اي بيت

ولكن هل تعترف فيه.. وفي دوره بحياتها؟ ابدددددا

.

تعترفين بوجود ابوك

تعترفين بوجود اخوك

ولكن هل تعترفين بوجود زوجك؟

.

تذكرت الفديو اللي انتشرت في الواتس اب

عن زوج اعطوه اهله مبلغ كبير عشان يتزوج على زوجته

لكن رح واشترى فيها ذهب

هل اشترى عشان يقهر اهله

لا

اشتراها اعتراف منه للدنيا ان هذي زوجته

.

لايفهم من كلامي ان الاعتراف بالفلوس والذهب 

كل شخص وله طريقته بالاعتراف

.

.

8- تعتمدين عليه

وهذي النقطه اللي خالفتو فيها نقطه الرفقه

اعتمدي عليه وعطيه استقلاله

ابشرحها بمثال

يبي يروح للصيدليه يجيب غرض.. قولي له ابخاااويك

مو ابي اروح معك

بيفهما انك بتشترين شي.. او لك مشوار ثاني او او من هالافكار اللي بيخليه يقول لا

اما ان "المخاوه" يعني بروح اونسك واسولف عليك.. هذي الرفقه

الاستقلال.. اذا قال بروح لخويااي.. تقولين لااااا

هنا بتوحين له انك ماتقدرين تعتمدين عليه وش رح يسوي هناك.. عطيه شوي استقلالية

احنا نعيش مع اهلنا.. بس مو نتشاق يوم نروح فيه عن انفسنا ونقابل بشر؟ 

ايش معنى اذا جاء الامر لزوجك قلت لااااااااا

.

اقربها اكثر.. طفلك 👶 مو يبغى يلعب مع اللي بعمره ولا يبغاك حوله

واذا شافك قال ماما روحي! 

ليه؟ 

لانه يبي يحس باستقلاليته

.

.

9-ادعميه

انا لاحظت زوجات تحب تموووت تكسر مجاديف زوجها!! ليه ليه

وش يجبره انه يعيش مع وحده تحطم فيه وتكسر في نفسه!

هذي النقطه من اخطرررر النقاط

.

تجي زوجة تقول.. روووح من زينك.. هذا وجهي اذا احد عطاك بنته

ويجي يطبخ لها على نار هاديه وحده تجلطها من القهر

.

ادعميه في مواقفه

في قصصه

في مشاريعه

لان اخر شي انتي المستفيده

.

.

10- هذي بنخليها في الخاص 🙈🙈🙈

ومو تتركون ابو الموضوع وتدقرون على هذي النقطه

.

.